بعد التخرج بيجي التشرد؟؟؟!

طابور طويل عريض... ماشيين فيه كلنا ... لابسين البالطو والكاب الإسود... وورانا أهالينا واصحابنا وكل حبايبنا... اللي بيزغرط واللي بياخد كام صوره في اليوم العالمي ده واللي بيعيط من الفرحة ومش مصدق إننا خلاص كبرنا ودي طبعًا "ماما".

لأ وماشيين كمان وقدامنا زفة حسب الله... هو المشوار مش بعيد من كليتنا لحد قاعة الاحتفالات الكبرى في الجامعة... بس المشوار اللي مشيناه في حياتنا لحد ما وصلنا لليوم ده هو اللي كبير وطويل فعلاً... 5 سنين ابتدائي على 3 اعدادي على 3 ثانوي وآخرهم 4 أو 5 جامعة... المهم إننا في اليوم ده وفي نهاية المشوار الطويل في الدراسة من ابتدائي للجامعة القصير في المشي من الكلية للقاعة... خدنا ورقة!!!
خدنا ورقة من الجامعة بتقول إننا إتخرجنا.... وهي في الحقيقة بتقول إننا خلاص مبقاش لينا قعاد في الجامعة... بيني وبينكم هو طرد بس بشياكة.... طول عمرنا من أيام المدرسة وهم دايمًا بيقولولنا المدرسة بيتكم التاني ولما كبرنا شويه وسبنا المدرسة بقت الجامعة بيتنا التاني... لأ وأحيان كتير بقت الجامعة بيتنا التالت والرابع كمان...
في ناس كانت بتروح الجامعة عشان تتعلم وتاخد محاضرات وسكاشن وامتحانات، وفي ناس تانية كانت بتروحها عشان هي النادي بتاعها فبتروح تشوف أصحابها وتقعد معاهم أو يعملوا أنشطة يخرجوا فيها الطاقات الكبيرة اللي عندهم أو يقابلوا أشخاص هم بيحبوهم، المهم إن كل الناس إللي كانت واخدة الجامعة جد أو اللي كانت واخدها فسحة بقي عندهم فراغ كبير بعد ما اتخرجوا... وناس كتير منهم حسوا إنهم اتشردوا.
بعد الجامعة الأيام بقت مختلفة... ومختلفة جدًا كمان... بالنسبه للولد والبنت... يمكن لأسوء يمكن لأحسن... حسب الظروف... بس عادةً اللي بيحصل إن البنت بعد ما بتتخرج- ده طبعا ف حالة عدم الحصول على وظيفة- بتقعد جنب ماما تتعلم كل حاجة عن البيت خصوصًا وإن الحجج بتاعت المذاكرة أيام الجامعة خلصت خلاص وياسلام بقى لو ماما متسربعة وعاوزة تجوزها... فالبنت هتلاقي نفسها كل يومين قاعدة في أوضة الصالون وفي حد ابن حلال جاي يعاين البضاعة قبل ما يشتري؟!!
أما الولد بقى فحالته حالة... لأن أهله بيتحملوه ويتحملوا مصاريفه أيام الجامعة على أمل إن هو لما يتخرج يشتغل... فلو مشتغلش بيسمع كل ساعتين كلمتين في جنابه.... لإنه مش بس المفروض يلاقي شغل لكن المفروض كمان يعمل أي حاجة ما تخليهوش يقعد في البيت زى البنات كده... لإنه طبعاً مش هيقعد يستنى العدل؟!!
المهم إن الحياة بعد التخرج ناس كتير بتشوفها وحشة... لأنهم بيعتقدوا إن النهاية في التخرج.... وعلى فكرة كلامي اللي مكتوب فوق ده بيحصل للناس اللي بتبقى حياتها في المذاكرة وبس... مع إن الحياة مش كده خااااااااالص.... وبجد
بعد التخرج بيكون عند الواحد أكتر من اختيار... هتقولوا لي إن احنا بنتخرج عشان نشتغل... طب ولو ملاقيناش شغل... نعمل ايه يعني؟!! نحط إيدنا تحت خدنا ونقول ما هو ده حال كل الناس وكل الشباب مش لاقي شغل... لأ وإيه في ناس كمان بتقول يللا نهاجر... طب وبعد ما تهاجر هتلاقي الشغل... والا هتلاقي يعني الخضرة والوجه الحسن هناك؟!! Absolutely وعلى رأي المثل "من خرج من داره إتقل مقداره"...
مش عارفة بس أنا بأشوف، ودي وجهة نظر شخصية... إن الحياة بتبتدي بعد التخرج... عارفين ليه؟!! لإن الواحد أيام الجامعة بيكون كل تركيزه على المحاضرات والسكاشن والأبحاث والتكليفات المطلوبة منه... ويا سلام لو هو مشترك في نشاط أو مثلاً بيمارس رياضة وعنده بطولة فالتركيز بيكون مضاعف لإنه لازم يعمل كويس في المذاكرة أو على الأقل يظبط نفسه إنه يعدي ولازم كمان يعمل كويس في الحاجة التانية اللي عنده جنب المذاكرة... يعني من الآخر مش بيكون شايف قدامه...
لكن بعد التخرج بيكون عنده وقت كبير... ناس كتير أول ما بتتخرج بتعمل دراسات عليا ماجستير يعني.. ده كويس بس هم عادة ما بيفكروش قبل ما بيعملوا ده وما بيدوش نفسهم فرصة عشان يفكروا أصلاً... لإن المفروض الواحد بعد ما يتخرج ياخد على الأقل سنة يقعد فيها مع نفسه... يرتاح من المذاكرة ويحس إنه اتخرج فعلاً وما بقاش عنده ضغوط المذاكرة والامتحانات ويفكر بقى برواقة هو عايز يعمل ايه؟!! لإنه مثلاً ممكن يكون عاوز يشتغل في حاجة غير اللي درسها في الكلية خالص... وهنا هيبدأ يتعرف على الحاجة الجديدة ديه ويحاول ياخد كورسات فيها... وممكن قوي يشتغل في حاجة بعيدة خالص عن دراسته ومع ذلك يلاقي نفسه فيها ويحب يطور نفسه أكتر... فيبقى لازم لو هكيمل دراسات عليا يكمل في نفس مجال شغله عشان يستفيد من الدراسة في الشغل وما يكونش مخه مشتت لإن الشغل في ناحية والدراسة في ناحية تانية خالص...
ده لو احنا بنتكلم عن حد هيكمل دراسات عليا بعد التخرج... أما بقى لو حد مالوش في المذاكرة أصلاً... وبدأ يدور على شغل فلازم يا جماعة الواحد يجرب كل حاجة... ما نقولش أصل أنا خريج الكلية الفلانية ودراستي في المجال الفلاني فما أقدرش اشتغل في حاجة تانية... الشغل مهما كان صغير أكيد الواحد هيتعلم منه... وحتى لو ما إتعلمش منه فهو أكيد هيتعلم من الناس اللي هيشتغل معاهم... مهما كانت الوظيفة اللي قدام الواحد فهو لازم يروح ويجرب... ما حدش عارف؟!! يمكن يطلع بيعرف يعمل الشغلانة دي كويس وهو ما يعرفش... يمكن يخرّب كمان بس محدش بيتعلم ببلاش ومفيش حد ما بيغلطش... واللي ما بيغلطش ما بيتعلمش أصلاً...
ناس تانية بقى بعد التخرج عملت حاجة أحسن من الدراسات العليا والشغل كمان... حاجة هم بيحبوها وفي نفس الوقت مفيدة ليهم... عارفين هي إيه؟!!... نموا مواهبهم... وما حدش يقولي أنا مش موهوب في حاجة لأني متأكدة إن كل واحد فينا بيتولد وجواه موهبة إدهاله ربنا يمكن هو يكون عارفها بس مش مهتم بيها... يمكن يكون مش عارفها أصلاً... بس أكيد كل واحد فينا عنده موهبة... عنده حاجة بيحب يعملها وبيعرف يعملها كويس كمان... واحدة صاحبتي كان نفسها تكون فاشون ديزاينر لكن التنسيق وداها لحتة تانية خالص ( كالعادة يعني) ... وطبعًا الجامعة لهتها عن أي حاجة تانية... لكن أول ما خلصت الجامعة رجعت تاني لموهبتها دي بدأت تدخل دايمًا علي النت وتقرأ عن الموضوع وتشوف أحدث التصاميم... وابتدت بحاجة صغيرة قوي لكن جميلة بدأت تشتري قماش ألوانه حلوة وماشي مع الموضة وخرز وزراير أشكالها جميلة وتعمل منها تصاميم لشنط تحفة... في الأول كانت بتبيع لأصحابنا وبعد كده أصحابنا جابوا أصحابهم لغاية ما بقت معروفه مش بس في الجروب بتاعنا لكن معروفة في الجروبس التانية كمان... ولإن ما عندهاش محل فبقت بتبيع للمحلات الكبيرة لكن بأسعار جااااااااااااااااااامدة لإن حاجتها فعلاً حلوة وبكده بقى عندها شغل هي بتحبه، وموهبة بتنميها وكمان دخل كويس...
المهم إن التخرج ما هواش نهاية المطاف... ومع إني كاتبة في الأول بعد التخرج ييجي التشرد... بس التشرد ده حالة طبيعيه للخبطة اللي الواحد بيعيشها بعد التخرج... لكن المهم إن فترة التشرد دي ما تطولش... ويلحق يقعد مع نفسه يشوف هو عايز يعمل ايه؟ وليه؟ وازي؟!! وأكيد... هيلاقي إن حياته الحقيقية ممكن يبدأها وبإيده بعد ما يتخرج

(الموضوع منقووووول )

بعد التخرج بيجي التشرد؟؟؟!

بعد التخرج بيجي التشرد؟؟؟!

مواضيع مماثلة

مواضيع مماثلة