في الفترة اللي فاتت دي بقيت اسمع كتير أوي ان في علاقات حب بتنهي بجمله غريبة جدا السبب ده سمعته كتير اوي وخصوصا و انا بسمع البرنامج الاذاعي الشهير انا و النجوم و هواك للمذيع اللامع الرومانسي الحالم المشهور بصوته الجذاب أسامه منير
أسامه يسألهم/ مرتبطة؟,, ترد:كنت,, يقولها/ طيب و ايه اللي حصل احكيلي,, تقوله: قالي انا مش عايز اظلمك معايا انا احنا لازم نسيب بعض احنا مهما عملنا حكايتنا مش حاتكمل ابداو يسيبها و يمشي والبنت تعيش الوهم ان هو عايش حياة مليانه بؤس و اصحابه ييجوا يقولولها ان هو و لا بينام و لابياكل و تعبان و دخل المستشفى و حالته تصعب ع الكافر وتفضل تقول ان هو ضحى بالحب علشان سعادتها و ان هو فعلا مش عايز يظلمها معاه طيب هل دي فعلا الحقيقة؟ هل ينفع اتنين يكونوا بيحبوا بعض و في اليوم اللي تيجي البنت تقوله ايه يا كابتن احنا حانفضل في اللي احنا فيه ده كتير و اللا ايه؟ انت مش حاتيجي تتقدم لبابا ؟؟ يكتشف بعديها بكام يوم ان هما ما ينفعوش لبعض و يبرر موقفه ان احنا في زمن ما فيهوش شغل فباتالي مش حاقدر اجيب شبكه و لا مهر و لا اجهز الشقة لاني اصلا مش معايا الشقة اللي اجهزها و الكلام ده و لسه هروح الجيش و حايضيع من عمري مش عارفة سنه و اللا اتنين و بعدين هطلع عقبال ما الاقي شغلانه عدله و أحوّش و أكوّن نفسي فيها مش اقل من 10 سنين و انا مش حاقدر أركنك جنبي طول الفترة دي فمعلش يا حبيبتي حبي ليكي يخليني و يجبرني اني اضحي بسعادتي علشانك و ينهي كل حاجة طيب معلش انا ببقى نفسي اسأل كل واحد بيقول الكلمتين دول



**هو انت حضرتك ما كنتش عارف كل ده في اللحظة اللي قلبك دق فيها و قررت انك هتروح تعترف بالحب الكبير اللي ملا قلبك و تقول بحبك للانسانه اللي كنت مستنيها من زمان كانت كل الظروف دي موجوده و اللا لأ؟ و اللا هي النكسه الاقتصاديه اللي في البلد هي و البطاله حصلت بعد ارتباط حضرتك و اللا ايه الأخبار؟ مش قادرة اقول فعلا الموضوع ده بينرفزني قد ايه,, بتحبها ؟؟؟؟ خلاص المفروض انك تتفق انت و هي اناهعمل كذا و حاجي بعد كذا و هحاول ابذل قصارى جهدي علشانك مش بكل هبل تقول مع السلامه إلا بقة لو انت واخد الموضوع ده حجه و ده الغالب من وجهة نظري ما عندوش كلام يقوله فبيقول الجمله الغريبه دي و و الله احيانا بعد لما البنت تقول ان هو قالها كدة تعرف ان هو خطب بعديها بأسبوع و اللا اتنين و اللا قابلته في الشارع مع واحدة و طلعت مراته و حاجات كدة غريبه فعلا بجد بيحصل
اقولك على حاجة؟

انت مالك يا سيدي هي راضيه انها تقعد تستناك كام سنه 10 كدة خمستاشر انت ايه اللي مزعلك هي اشتكت انت لو مفهمها الظروف و بينكم تفاهم و هي شايفه انك فعلا بتحاول تعمل حاجة علشان تسعدها مش حايفرق معاها سنه من عشرة هي البنت كدة لو حست انك بتقدم خطوة بتقدم هي عشرة و يمكن اكتر على حسب قدرتها على المشي00و بعدين الأهل خلاص ما بقوش زي الأول ما بقوش زي اللي بييجوا في التليفزيون خلاص الأهل دلوقتي ما بيصدقوا أصلا ان في عريس جاى لبنتهم لان هما عارفين ان في ازمه عرسان في البلد زي ما في ازمه شغل كدة بالظبط و بقوا غلابه كدة و يقولوا الرأي رأي البنت الا القله القليل يعني احنا برده مش عايزين نعمم الكلام يعني تقريبا الأكتر خلاص ما بقوش يطلبوا الشبكه اللي بالشئ الفلاني و لا الشقة اللي لازم تبقى 4 إوض و صالتين و بلاكونه بحري و حمامين و روف جاردن خلاص تقريبا الحوارات دي خلاص قربت تنقرض خلاص دلوقتي عندي شقه حاتقعد مع مامتي كل ده حتى لو هما شايفين ان العريس مش قد كدة و مش داخل دماغهم أوي بقوا خلاص يقولوا البنت عايزة كدة خلاص دي حياتها و هي حرة فيها علشان هما عارفين ان هما لو ما وافقوش و الموضوع مشي برضاهم ممكن هما يمشوه بغير رضاهم و بوسائل غلط و هما اللي
يبقوا السبب في الآخر في المشاكل الكتير اللي ممكن تترتب
على رفضهم ده


ياريت كل واحد يقول رأيه بصراحه من غير مايكون كل همه النقد
لأن ده هو اللي بيحصل ف
منقوووووووووووووووووول

ممكن اكيد فى كده كتير بس فى بردوا الكويسين
بس هو فعلا لو بيحبها هيبذل كل مجهوده عشان تبقى ليه وهى اما تلاقيه بيبذل مجهوده كده هتستناه

للاسف الكلام دا فعلا حقيقى

وبيحصل كتير

بس هما فعلا كلهم كدا

بيقضوا يومين وبس

طب ليه علقها بيه من الاول

ولما دخل فى الحب بجد يسبها ويبعد

كل يوم بنات كتير دموعها على خدها لنفس السبب دا

نفسى بجد حد من الشباب يدخل يرد ويقول سبب واحد مقنع

هو الحب كدة
ممكن ينجح وساعتها بيبقي اعظم شئ في الدنيا
وممكن يفشل وساعتها لو الشاب هو السبب في كدة تقولو دا خدعني واستغلني وعلقني بوهم وضيعت عمري معاه وانا السبب اني صدقتة
ولو البنت هي السبب في فشل الحب
الشاب يقول دي خاينة وباعتني ومكنتش تستاهل حبي ولو للحظة واحدة انا خلاص ادمرت
يعن عاوز اعرفكم انة لازم يكون في ظالم ومظلوم
مش دايما الشباب هو اللي بيبيع
ومش دايما البنات هي اللي بتبيع
يبقي اية الحل؟
الحل حسن الاختيار يعني لو انتي اخترت حد وبعد كدةعرفتي انة ميستهلش تبقي انتي اللي غلطانة مش هو
هو ماعلية انة اتعرف علي واحدة بتحبة ومصدقاة فخلاص يقضي يومين ويخلع
ونفس الحال انا كشاب لازم اختار الانسانة اللي حرتبط بيها كويس مش واحدة حلوة وجميلةيبقي خلاص لازم نحب بعض ونرتبط وكدة
لا لازم تكون انسانة محترمة علشان بعد كدة تصوني
مش اختار بنت جميلة اوي وبنت عائلة بس اخلاقها مش كويسة وارجع اقول دي خاينة وباعتني وكدة
لا ساعتها اعرف علطول ان اللي حصل ده من غبائي اني معرفتش اختار
فالموضوع مش شباب بيبيع وبنات ضحايا ولا العكس
العملية عملية حسن اختيار بعيد عن المظاهر اللي بنتغش فيها
وبالنسبة للموضوع دة طبعا في كلام مينفعش اطرحة
انتوا عارفين طبعا بيكون في تنازلات كتير بتقلل من الشاب والبنت